जाजरकोटबासी प्राकृतिक प्रकोपसँग उच्च जोखिम मोल्दै अहिलेसम्म १४ जनाको मृत्यु

A+ A-


जाजरकोटका विभिन्न ठाउँमा यस वर्ष पनि बाढी पहिरोको कारण बाट १४ जनाको मृत्यु भएको छ भने करोडौं मूल्य बराबरको धनसम्पति तथा भौतिक संरचना क्षेती भएको छ।
यहि गत साउन ४ गते पहिरोले जुनीचाँदे गाउँपालिका–६ का भक्तबहादुर बूढाको घर पुरिँदा उनकी श्रीमती लली र ९ वर्षीया छोरी सिर्जनाको मृत्यु भयो। भक्तबहादुरसहित तीन जना घाइते भएका छन्। पहिरोबाट बुढाको रु ७ लाख ७५ हजार बराबरको सम्पत्ति नष्ट भएको जिल्ला विपद् व्यवस्थापन समितिको तथ्यांकमा उल्लेख छ।


 

समितिले मृतकका आफन्तलाई क्षेतीपूर्ति स्वरुप जनही रु १ लाख तथा पीडित परिवारलाई रु १० हजार उपलब्ध गराएको छ। प्रमुख जिल्ला अधिकारी ललितकुमार बस्नेतका अनुसार कर्णाली प्रदेश सरकारले मृतकलाई रु २५ हजार तथा जुनीचाँदे गाउँपालिकाले रु २५ हजार राहत उपलब्ध गराएको छ।
यस्तै, गत साउन २० मा पहिरोले भेरी नगरपालिका–३ मा २५ वर्षीया शितली लुहार, १० वर्षीया रञ्जना लुहार, सात वर्षीया मनिषा लुहार, तीन वर्षीया भगवती लुहार, पाँच वर्षीया नज्मा बोहरा, १३ वर्षीय नरेन्द्र परियार, ११ वर्षीय नविन परियार, पाँच वर्षीय दशरथ परियार र ११ वर्षीय गोविन्द परियारको मृत्यु भएको छ।


पहिरोबाट नौ परिवारको रु २५ लाख बराबरको सम्पत्ति क्षति भयो। मृतकका परिवारलाई विपद् व्यवस्थापन समितिले जनही रु १ लाख, घरधनीलाई जनही रु २५ हजार, जोखिममा परेकालाई अवस्था हेरी रु ८ हजारदेखि रु १५ हजारसम्म राहत उपलब्ध गरायो। कर्णाली प्रदेश सरकारले जनही रु २५ हजार, समाजसेवी तथा निर्माण व्यवसायी रत्नबहादुर खड्काले जनही रु ३० हजार र उद्योग वाणिज्य सङ्घले रु २२ हजार ५०० उपलब्ध गराएको छ।
यसैगरी गत साउन २८ गते बाढीले नलगाड नगरपालिका–७ का उमेश शाहीको मृत्यु भयो। सो नगरपालिकाका विभिन्न वडामा आएको बाढी, पहिरो र भू–क्षयबाट २६ घर पूर्णरूपमा क्षति तथा २५ घरमा आंशिक क्षति पुगेको थियो। बाढी पहिरोका कारण ४३ परिवार विस्थापित र ८२ परिवार जोखिममा छन्। बाढी पहिरोले १०६ रोपनीमा लगाएको धान, मकै र अलैँची पूर्णरूपमा क्षती भएको छ ।


नलगाडमा रु १६ करोडको सम्पत्ति तथा भौतिक संरचना नष्ट भएको छ। नगरपालिकाले मृतकको परिवारलाई राहत स्वरुप जनही रु एक लाख, विस्थापितलाई रु ५० हजार, घर आंशिक रूपमा क्षति भएकालाई जनही रु २० हजार राहत वितरण गरिएको छ।
यही भदौ २ गते जुनीचाँदे गाउँपालिका–४ का पाँच वर्षीय महेश चदाराको बाढीले बगाएर तथा भेरी नगरपालिका–१ की १३ वर्षीया पुष्पा चदाराको बाढीले बगाएर मृत्यु भयो। उनीहरूलाई विपद व्यवस्थापन समितिले रु एकरएक लाख उपलब्ध गराइएको छ ।


आमाबाबु गुमाएका आठ वर्षीय सुरेन्द्र परियारको लालनपालन, शिक्षाको व्यवस्था गर्ने गरी उनलाई एसओएस बालग्राम सुर्खेतमा भर्ना गरिएको प्रजिअ बस्नेतले बताए।

प्रतिक्रिया दिनुहोस

sidebar2
sidebar3
sidebar4
sidebar5
sidebar6
sidebar6
web
analytics