पश्चिम भूभागमा वर्षा

A+ A-

मङ्गलवार पश्चिमका केही क्षेत्रहरूमा वर्षा भइरहेको छ।

मौसम पूर्वानुमान महाशाखाका अनुसार विशेषगरी काठमाडौँ भन्दा पश्चिम भूभागमा वर्षा भइरहेको जनाएको छ ।त्यस्तै उच्च हिमाली भूभागमा हल्का देखि मध्यम हिमपात भइरहेको छ ।

देशको पश्चिमी भूभागमा सामान्य देखि पूर्ण बदली र बाँकी भूभागमा सामान्य बदली भई पानी परि रहेको मौसम विद्ले जनाएका छन्।

पश्चिममा पानी पारेको पश्चिमी वायु पूर्व सर्ने क्रममा रहेकाले अहिले देशभरीकै मौसम बदली भएको र उच्च हिमाली क्षेत्रमा हिमपात भइरहेको मौसमविद्ले बताएका छन् ।

मौसमविद् शान्ति कँडेलका अनुसार मङ्गलवार देशभरी कै मौसम पूर्ण रूपमा खुल्ने सम्भावना छैन । विशेषगरी दिउँसो पश्चिममा पानी र हिमपात भए पनि राति भने काठमाण्डौसहित मध्य र पूर्वको केही ठाउँमा पनि मेघगर्जनसहित पानी पर्ने अनुमान छ ।

मौसम पूर्वानुमान महाशाखाको बुलेटिन अनुसार पश्चिमी वायुको प्रभावका कारण बदली हुने, पानी पर्ने र हिमपात हुने क्रम बढेको हो । पर्सि बिहीबारबाट मौसममा क्रमिक सुधार हुँदै जाने उनले जानकारी दिइन् ।

काठमाडौँ उपत्यकामा बिहानैदेखि बादल लागेको चिसो महसुस भइरहेको छ । बिहान साढे ६ बजे गरेको मापन अनुसार काठमाडौँको न्यूनतम तापक्रम ५ डिग्री सेल्सियस रहेको छ ।

मङ्गलवार बेलुका भने देशको पहाडी भूभागमा सामान्य देखि पूर्ण बदली र बाँकी भूभागमा सामान्य बदली हुनेछ । हिमाली भेगका अधिकांश स्थानहरूमा हल्का देखि मध्यम हिमपातको पनि सम्भावना देखिन्छ भने पूर्वी हिमाली भेगका थोरै स्थानहरूमा हल्का हिमपातको सम्भावना रहेको छ।

प्रतिक्रिया दिनुहोस

sidebar2
sidebar3
sidebar4
sidebar5
sidebar6
sidebar6
web
analytics