नुवाकोटमा खोलाले बगाउँदा बालक बेपत्ता

A+ A-

नुवाकोटको किस्पाङ गाउँपालिका–१ भाल्चेका सरोज घलेलाई सोमबार विद्यालयबाट फर्कदै गर्दा खोलाले बगाएर बेपत्ता बनाएको छ ।

फिकुरीस्थित प्रहरी चौकीका प्रहरी सहायक निरीक्षक महानन्द यादवका अनुसार सोमबार किस्पाङ–३ स्थित होलिभिजन पब्लिक बोर्डिङमा अध्ययनरत ९ वर्षीय घलेलाई जानगन्दो खोलाले बगाएकामा खोजी गरिए पनि मंगलबार बिहानसम्म फेला पार्न सकिएको थिएन ।

विद्यालयबाट फर्केका तीनमध्ये घलेलाई बगाएर बेपत्ता बनाएपछि स्थानीयवासीको सहयोगमा प्रहरीले खोजतलास जारी राखेको छ ।

खोलामा पुल नहुँदा वर्षाको समयमा आउने बाढीले आवतजावतमा समस्या हुँदै आएको स्थानीयवासीले जनाएको छ । किस्पाङ–१ बाट गाउँपालिकाको कार्यालयसमेत रहेको स्थान वडा–३ को काहुलेतर्फ जाने बाटोमा उक्त खोला पर्छ ।

प्रतिक्रिया दिनुहोस

web
analytics