अब चार घन्टामै केरुङ पुगिने !

काठमाडौंलाई चीनसँग जोड्ने दुई देशको उच्च रणनीतिक महत्वको सबैभन्दा छोटो सडक असारभित्रै खुल्ने भएको छ । यो खबर हामीले बुधवारको अन्नपुर्ण पोस्टबाट लिएका हौँ । अन्नपुर्ण पोस्टमा गोपीकृष्ण ढुंगाना लेख्छन्, मैलुङदेखि स्याफ्रुबेसीसम्मको १६ किलोमिटर ट्र्याक खोल्ने जिम्मेवारी पाएको नेपाली सेनाले ७ किलोमिटर डबल लेन, ८ किलोमिटर सिंगल लेन खोलिसकेको छ भने १ किलोमिटर खोल्न बाँकी छ ।

सडकखण्ड ट्र्याक खोल्ने जिम्मेवारी पाएका मेजर सञ्जय केसीले मैलुङबाट स्याफ्रुबेसीसम्मको सडकखण्ड जोड्न अब एक किलोमिटर मात्र बाँकी रहेको र उक्त काम असारभित्रै सम्पन्न गर्ने जानकारी दिए । निर्माणाधीन सडक पासाङल्यामु राजमार्ग वेत्रावती-धुन्चे-स्याफ्रुबेसीको वैकल्पिक मार्ग हो । नयाँ सडक बनेपछि उत्तर (चीनको केरुङ)-दक्षिण (भारतको ठोरी) जोडिनेछ जुन त्रिदेशीय सडक जोड्ने सबैभन्दा छोटो सडक हुनेछ । उक्त खण्ड एउटा पनि घुम्ती सडक नहुनेगरी बनाइएको छ ।

‘निर्माणाधीन सडक डेडिकेटेड डबल लेनको अर्थात् ९ मिटर चौडाइको हुनेछ । विगतजस्तो विस्फोटक पदार्थ र इन्धनको अभाव नभएकाले अब काम समयमै सकिनेछ’ उनले भने । नेपाली सेनाको विकास निर्माण निर्देशनालयका प्रमुख उद्धव बिष्टले सबै सडक डबल लेन निर्माणको काम सकेर कात्तिकभित्रै सडक विभागलाई हस्तान्तरण गर्ने जानकारी दिए ।

सडक हस्तान्तरण गरेपछि विभागले कालोपत्रेको काम अघि बढाउनेछ । विभागबाट उक्त खण्डका प्रमुख प्रकाश भण्डारीले मुआब्जाको काम भइरहेको र सेनाबाट हस्तान्तरण हुनासाथ कालोपत्रेका लागि प्रक्रिया अघि बढाउने जानकारी दिए । वैकल्पिक उक्त मार्ग निर्माण सम्पन्न भएपछि गल्छीदेखि नाका रहेको स्थान रसुवागढीको लम्बाई ८४ किलोमिटर हुनेछ । स्थलगत निरीक्षणका लागि पुगेको संसद्को विकास समितिका सभापति रवीन्द्र अधिकारीले मैलुङ स्याफ्रुबेसी सडकले उत्तर-दक्षिण जोडेपछि उक्त सडक ‘लाइफ लाइन’ हुने भन्दै सडकले त्रिदेशीय भूमिका खेल्ने बताए ।

अधिकारीले भने ‘नाकामा रसुवागढी उताको विकास (भन्सार र अध्ययगमनको भवन र सडक आदि) हेर्दा नेपालतर्फ केही काम भएकै छैन । चीन सरकारले केरुङसम्म तीन वर्षभित्र रेल ल्याउँदा सोअनुसारको सम्पूर्ण पूर्वाधार हामीले पनि नेपालतर्फ निर्माण गरिसक्नुपर्ने चुनौती बढेको पायौं ।’ उनले नेपालले गढीमा अन्तर्राष्ट्रियस्तरको भन्सार र त्यसका लागि झन्डै तीन वर्षअघि नै रसुवागढी भन्सार एकीकृत कार्यालय बनाउन लागे पनि सर्वोच्च अदालतमा मुद्दा परेकाले अझै काम हुन नसक्नु लज्जास्पद भएको प्रतिक्रिया दिए ।

रसुवाका सांसद जनार्दन ढकालले गल्छीदेखि मैलुङ-स्याफ्रुबेसी हुँदै रसुवागढीसम्मको सडकलाई उच्च रणनीतिक सडकका रूपमा लिइएकाले गढीलाई दोस्रो अन्तर्राष्ट्रिय ठूलो नाका बनाउन नेपाल सरकारले कत्ति पनि ढिलो गर्नु नहुनेमा जोड दिएका छन् ।

ढकाललेले भने ‘केरुङसम्मको स्थलगत निरीक्षणले नेपालले नाका र नाकासम्मका भौतिक पूर्वाधार निर्माणका लागि आवश्यक ऐनकानुन सच्याएर फटाफट काम अघि बढाउनुपर्ने चुनौती थपेको छ ।’ नेपाल र चीन सरकारबीच रसुवागढीदेखि स्याफ्रुबेसीसम्मको १६ किलोमिटर सडकलाई ९ मिटर चौडाइको डबल लेन सडक कालोपत्रे गर्नेसम्मको हालैको सम्झौताबमोजिम काम अघि बढाएको छ ।

गोसाइँकुण्ड गाउँपालिकाका अध्यक्ष कैसाङ नोर्पु तामाङले सुख्खा क्वारेन्टाइन, भन्सार, अध्यागमन र बन्दरगाह निर्माणका लागि सरकारले तत्काल विनारोकावट कामलाई अघि बढाएर दुई वर्षभित्रै सम्पन्न गर्ने वातावरण बनाउन आग्रह गरेका छन् ।

प्रतिक्रिया दिनुहोस

sidebar1
sidebar2
sidebar3
sidebar4
sidebar5
sidebar6
sidebar6
web
analytics