काठमाडौं - कृषि तथा पशुपन्छी विकासमन्त्री रामनाथ अधिकारीले नेपालका हिमाली र पहाडी क्षेत्रका जडीबुटी खाएर हुर्किएका भैँसीको मासु उच्च गुणस्तरीय हुने बताएका छन् ।

प्रधानमन्त्री केपी शर्मा ओलीको चीनको भ्रमणका क्रममा नेपालबाट प्रशोधित राँगा भैँसीको मासु निर्यात सम्बन्धी सम्झौता भएको र सोही सम्झौता बमोजिमको बृहत् परियोजना कार्यान्वयन घोषणा कार्यक्रममा बोल्दै उनले सो गुणस्तरलाई कायम राख्न भैँसी पालनमा नयाँ प्रविधिको प्रयोग र प्रवर्धन गर्नुपर्ने बताएका हुन् ।

मन्त्री अधिकारीले भने, ‘नेपालका गाउँहरूमा सुदृढ सडक संरचना र बाटोघाटोको विकासले गर्दा, अब उत्पादन भएका मासुहरू बजारमा सजिलै ल्याउन सकिन्छ र यसले निर्यातको अवसरलाई अझ बढवा दिनेछ ।’

उनले नेपाल मासु र दुधमा आत्मनिर्भर भएको र अहिले दुग्धजन्य पदार्थ र दूध निर्यात गरिरहेको जिकिर गरे । यसबाट रोजगारका अवसर पनि सृजना भएको र ग्रामीण क्षेत्रमा आर्थिक समृद्धि ल्याउने अवसर सिर्जना भएको उनले बताए ।

नेपाल सरकारले पशुपालन र दुध उत्पादनमा उच्च गुणस्तर कायम गर्न निरन्तर काम भइरहेको मन्त्री अधिकारीले जोड दिए । उनले चीनमा मासुको विभिन्न परिकारलाई स्थानीय जनताले रुचाउने भएकाले तीव्र रूपमा मासु निर्यात गर्ने योजना बनाइरहेको उल्लेख गरे ।