भारतको दक्षिणी प्रान्त केरलामा केही दिनयताको भारी वर्षा सँगैको बाढीपहिरोका कारण मृत्यु हुनेको संख्या ३ सय ५७ पुगेको छ । बाढीका कारण करिब ३ अर्ब डलर बराबरका संरचनामा क्षति भएको जनाइएको छ ।

अधिकारीहरुले पछिल्लो २४ घण्टामा ३३ जनाको शव भेटिएको बताएका छन् । बाढीका कारण हजारौं नागरिक विस्थापित बनेका छन् । मृतकको संख्या अझै बढ्न सक्ने जनाइएको छ । भारतीय मौसम पूर्वानुमान संस्थाले आगामी केही दिन वर्षा हुने भएकाले डुबानको समस्या थप विकराल बन्न सक्ने चेतावनी दिएका छन् ।

बाढीका कारण करिब ८ लाख मानिसहरु विस्थापित भएका छन् । केरलाका मुख्यमन्त्री पिनरायी भिजयानले भने, ‘७ लाख २४ हजार ६ सय ४९ विस्थापितहरु ५ हजार ६ सय ४५ अस्थाई शिविरमा छन् ।’ उनले २२ हजार ३४ को उद्धार गरिएको जनाए ।

भिजयानले पानीको बहाव नघटेकाले केही सयम संकट कायमै रहने जनाए । उनले उद्धारका लागि सुरक्षाकर्मी खटिरहेको जनाउँदै विस्थापितलाई पानी तथा खानेकुरा आपूर्तिमा समस्या भएको जनाए ।

भारतीय सञ्चारमाध्यमका अनुसार बाढी प्रभावितको उद्धारका लागि सुरक्षाकर्मीहरु हेलिकप्टर तथा डुंगासहित खटाइएको जनाएका छन् । भारतको केरलाबाट बग्ने ३ दर्जनभन्दा बढी नदी अरबी समुद्र पुग्छन् । बाढीका कारण इडुक्की, मालापुराम, कोझीकोडे वायानाडा र इर्नाकुलामलगायतका जिल्ला बढी प्रभावित भएका छन् ।

शनिबार बाढी प्रभावित क्षेत्रको भ्रमण गरेका भारतीय प्रधानमन्त्री नरेन्द्र मोदीले मृतकका परिवार तथा घाइतेलाई राहतको घोषणा गरेका थिए ।