पूर्व तथा मध्य तराईका नदीमा बाढीको खतरा
- नेचर खबर
बुधवारदेखि नै परेको पानीले पूर्वको झापाबाट मध्य तराईको बारासम्मका नदीमा बाढी आउने सम्भावना रहेकाले नदी किनार आसपासका बासिन्दालाई सावधानी अपनाउन बाढी पूर्वानुमान महाशाखाले आग्रह गरेको छ ।
बिहीबार पूर्व र मध्य क्षेत्रका केही ठाउँमा ठुलो पानी पर्ने भएकाले तराईमा डुबान तथा पहाडमा पहिरोको जोखिम बढेको भन्दै सावधानी अपनाउन शाखाले आग्रह गरेको हो । कन्काई, कमला, बाग्मती, खाडो, रातु लगायत चुरेबाट बहने साना नदीमा बाढी आउने सङ्केत महाशाखाले गरेको छ ।
मध्य वर्षामा समेत निष्क्रिय भएको मनसुन साउनको अन्तिम सातामा सक्रिय भएको छ । मनसुन सक्रिय भएसँगै बुधवार मध्यान्हदेखि देशैभर बदली भइरहेको छ ।
जल तथा मौसम पुर्वानुमान महाशाखाका अनुसार अहिले देशैभर बदलीको अवस्था रहेको छ । यद्यपि ठुलो पानी भने पर्न सकेको छैन । महाशाखाका मौसमविद् समीर श्रेष्ठले भने, ‘यो क्रम शनिवारसम्म रहने देखिन्छ ।’ उनका अनुसार बिहीबार बेलुका सुदुर पश्चिमका तराई क्षेत्रमा र पूर्वी क्षेत्रमा भारी वर्षा हुने सम्भावना रहेको छ ।
प्रतिक्रिया दिनुहोस