नेपालमा शुक्रबार (जेठ २५) गतेदेखि मनसुन प्रवेश गरेको छ । औषत समयभन्दा दुई दिन छिटो मनसुन नेपालको पूर्वी भागबाट प्रवेश गरेको जल तथा मौसम पूर्वानुमान महाशाखाले जनाएको छ ।

पूर्वी भेगबाट नेपालमा मनसुन प्रवेश गरी क्रमश पश्चिमतर्फ विस्तार हुने क्रममा रहेको छ । महाशाखाका अनुसार, केही दिन भित्रै नेपालभर फैलिने अनुमान गरिएको छ । नेपालमा सामान्यतया मनसुन १० जुनमा प्रवेश गर्ने गर्छ । यस आधारमा यस वर्षको मनसुन २ दिन अघि शुरू भएको हो

नेपालमा साधारणतया जुन देखि सेप्टेम्बरसम्म चार महिनाको अवधिलाई दक्षिण एसियाली मनसुनको अवधि भनिन्छ । उक्त समयमा नेपालमा वार्षिक वर्षाको करिब ८० प्रतिशत वर्षा हुने गर्दछ । विज्ञहरुको आँकलन गरिए अनुसार यस वर्षको मनसुनी वर्षा नेपालको अधिकांश भू(भागहरुमा सरदर वर्षा हुने अनुमान गरिएको छ । स्मरणिय छ, सामान्यतया सरदर वर्षा भन्नाले स्थान विशेषको लामो समयको (करिब ३० वर्ष) औसत वर्षालाई बुझिन्छ । सरदर वर्षाको ९० प्रतिशत देखि ११० प्रतिशत सम्म वर्षालाई सामान्य वर्षा मानिन्छ भने सो भन्दा कम र बढि वर्षा भएमा क्रमश न्युन वा अधिक वर्षा भएको मनिन्छ ।भारतको केरला, भुटान हुँदै नेपाल मनसुन प्रवेश गरेको हो । मौसमी नक्सा, भूउपग्रहहरूबाट प्राप्त बादलका तस्बिरका आधारमा मनसुनको अनुमान गरिने गरिन्छ ।

सन् २०१७ मा मनसुन जुन १२ मा भित्रिएको थियो, भने सन् २०१५ मा जुन १५ मा मनसुन सुरु भएको थियो। यस वर्ष नेपालमा औसतमा वर्षा हुने मौसमविदहरुले पूर्वानुमान गरेका छन्।