दिल्लीमा प्रदुषण कम गर्नका लागि सोमबारदेखि जोर बिजोर प्रणाली सुरु गरिएको छ । यो योजना अनुसार दिल्लीमा सोमबारदेखि १५ नोभेम्बरसम्म बिजोर मितिमा बिजोर नम्बरका गाडी र जोर मितिमा जोर नम्बरको गाडी मात्रै सडकमा चल्न पाउने छन् ।

भारतको राजधानी दिल्लीसहित वरिपरिका इलाकामा प्रदुषण घातक स्तरमा पुगिसकेको छ । आइतबार दिल्ली–एनसीआरमा हावाको गुणस्तर (एयर क्वालिटी एक्यूआई) १ हजारको आँकडा पार गरेको छ ।
दिल्लीमा हेल्थ इमर्जेन्सी (स्वास्थ्य आपतकाल) पहिलेदेखि नै लागू छ तर स्थिती दिन प्रतिदिन बिग्रदो स्थितीमा छ ।

भारतीय प्रधानमन्त्री नरेन्द्र मोदीका प्रधान सचिव पीके मिश्राले भिडियो सम्मेलनमार्फत् प्रदुषको स्थितीमा दिल्ली, पंजाब र हरियाणा सरकारका सम्बन्धित अधिकारीसँग एक महत्वपूर्ण बैठक गरे ।

बैठकमा क्याबिनेट सचिवले लगातार प्रदुषणको स्थितीमा निगरानी राख्ने निर्णय भएको छ । साथै पंजाब, हरियाणा र दिल्लीका मुख्य सचिवले हरेक दिन आ–आफ्नो राज्यमा प्रदुषणको स्थिती निगरानी गर्ने पनि निर्णय भएको छ ।

यसका साथै दिल्ली नजिकैका गाजियाबाद, नोएडा, ग्रेटर नोएडा, गुरुग्राम र फरिदाबादमा पनि नोभेम्बर ४ र ५ का लागि स्कूल बन्द गरिएको छ । दिल्लीमा पहिले नै स्कूललाई बन्द गर्ने आदेश दिइसकेको छ ।मुख्यमन्त्री अरविन्द केजरीवालले मानिसहरुसँग यो योजनामा सहयोग गर्न अपिल गरेका छन् ।
एजेन्सी